„ВО АМФИТЕАТАР СО…“ – ПРОФ. Д-Р МАРИЈА ХАЏИ-НИКОЛОВА

Име и презиме: Марија Хаџи-Николова

Факултет каде што предавам, титула и област на специјализација: 

Факултет за природни и технички науки, редовен професор, област – животна средина.

Образование:

Формално – дипломирав на Интердисциплинарните студии по заштита при работа на Машински факултет, Универзитет „Св. Кирил и Методиј“ – Скопје. Магистрирав и докторирав во областа на животната средина на Факултетот за природни и технички науки, Универзитет „Гоце Делчев“ – Штип.

Неформално – обуки, работилници, конференции, во земјава и во странство.

Краток професионален профил:

Мојот професионален ангажман го започнав како демонстратор на Факултетот за природни и технички науки за време на магистерските студии. Наредните години продолжив професионално да се развивам на Факултетот за природни и технички науки, почнувајќи од помлад асистент, асистент, доцент, вонреден професор и денес сум остварен и посветен редовен професор со долгогодишно искуство во областа на животната и работната средина, со докажана експертиза во овие две области и посебна посветеност на наставата, истражувањето и менторство. Кога сме кај наставата, посебен фокус ставам на унапредување на знаењето, негување на интелектуалната љубопитност кај студентите и создавање на нова генерација истражувачи и професионалци. Големо значење во мојот професионален развој секако има и соработката со индустрискиот сектор, како во областа на животната, така и на работната средина. Учесник сум во повеќе од 50-тина научноистражувачки и апликативни проекти, студии, елаборати за оцена на влијанието врз животната средина, предавач на обуки за БЗР на вработените во рударството.

Во три збора би се опишал/а себеси како:

Амбициозна, смирена, самоуверена.

На УГД се вработив (кога и како):

За време на магистерските студии, во 2006 година, почнав да работам како демонстратор на Факултетот за природни и технички науки во Штип. По нивно завршување во 2008 година се вработив како помлад асистент.

УГД ми помогна во мојот професионален развој преку:

Можност за користење на иновативни педагошки техники и методи за предавања поддржани со напредна информатичка технологија. Обезбедување на услови за спроведување на оригинални истражувања во областа на животната и работната средина, објавување на трудови во престижни списанија, учество на домашни и меѓународни конференции. Посебно значење за мојот професионален развој секако има Лабораторијата АМБИКОН, која функционира во рамки на Факултетот за природни и технички науки, каде што сум ангажирана како стручен соработник за бучава и менаџер за квалитет.

Во врска со УГД најмногу ми се допаѓа:

• Посветеноста на студентите и нашата достапност за нив, буквално во секое време;
• Можноста за надополнување на теоретското знаење на студентите со практично во лабораториите во рамки на Универзитетот;
• Можноста за вклучување на студентите во истражувачка работа;
• Континуирано подобрување на квалитетот на образованието и научното истражување;
• Воведување иновации, дигитализација и воспоставување соработка со локални и меѓународни институции, универзитети и бизнис-заедницата;
• Следењето на светските трендови во високото образование и науката;
• Достапност на раководството.

Омилен дел од мојата работа:

Пренесување на моето знаење и експертиза во областа на животната средина на студентите, да им помогнам да ги усовршат своите истражувачки вештини и да го трасираат патот на нивната понатамошна кариера. Вклучување на студентите во истражувачкиот процес, поттикнување на нивно критичко размислување и развој на аналитички вештини, процес кој ќе им овозможи подоцна да објават свои публикации, учество на конференции, поттик на нивниот понатамошен професионален развој.

Во полето на научноистражувачката работа учество во голем број научни и апликативни проекти во областа на мониторинг и моделирање на дисперзија на бучава во животната средина, истражување на главните извори на бучава и предлог-мерки за намалување на нивото на бучава, изработка на акциони планови (предлози и приоритизација на мерките), како дел од тимот на Лабораторијата АМБИКОН.

Соработката со индустрискиот сектор за промовирање и зголемување на безбедносната култура кај работниците, подигање на свеста за почитување и примена на мерките за безбедно извршување на работните задачи.

Од професионални достигнувања издвојувам:

• Задоволни  и успешни студенти, кои брзо се интегрираат во општеството како успешни инженери за заштита на животната средина, секогаш расположени за совет и достапни за соработка по вработувањето;
• Објавени трудови во реномирани списанија и научни бази;
• Тим-лидер на голем број проекти поврзани со моделирање на дисперзија на бучава и предлог-мерки за намалување на нивото на бучава;
• Успешна соработка со индустрискиот сектор во областа на животната и работната средина;
• Мојот придонес за Лабораторијата АМБИКОН да прерасне во една од водечките лаборатории за животна и работна средина во државата.

Методологија што ја користам во работата со студентите:

Мојата работа со студентите се базира на интерактивен пристап приспособен на нивните претходни знаења, со цел овозможување и олеснување на нивното ефективно учење, поттикнување на нивното критичко размислување и промовирање на проактивен ангажман на студентите. Споделување на практични искуства, кои ќе им овозможат полесно разбирање на наставниот материјал и продлабочување на нивните знаења. Презентирање на студентите на реални проблеми или сценарија и нивно учество во решавање на истите. Студентите работат заеднички за да ги анализираат проблемите, да предлагаат решенија и да применуваат знаења од различни дисциплини. Промовирање на истражувачки дух кај студентите и можности за креативно решавање на проблеми. Воспоставување позитивни односи со студентите врз основа на доверба, меѓусебно почитување и емпатија.

Најважно во работата со студентите е:

• Активно ангажирање на студентите во процесот на учење преку интерактивна настава, дискусии и проекти за соработка;
• Поттикнување на студентите да ги прифатат предизвиците, да учат од неуспесите и да истраат во нивните напори да ги постигнат своите цели, промовирање верба во сопствениот потенцијал за раст и развој;
• Охрабрување на студентите да размислуваат критички, да ги преиспитуваат претпоставките и да ги оценуваат доказите;
• Обезбедување можности за учење базирано на истражување, решавање проблеми и анализа на сложени прашања кое ќе им помогне на студентите во промовирање на нивната интелектуалната љубопитност и ги подготвува да се движат низ комплексноста на светот надвор од предавалната.

Животна мудрост што ја споделувам:

„Не стремете се да бидете успешни, туку да бидете вредни“.

„Најголемата инвестиција што може да се направи е инвестицијата во сопственото образование; таа е најсигурниот пат до успехот“.

Книга, видео, филм, поткаст или настан кој би го препорачал/а:

• Книга – „Како да разговарате со секого“ од Лил Лаундес;
• Филм – „Beautiful Mind“;
• Видео (документарец) – „The walk“;
• Настани – обуки, вебинари и работилници од областа на животната и работната средина.

Совет за младите како идни студенти:

• Истражете ги вашите интереси: Издвојте време да ги истражите вашите интереси и вашата љубопитност. Следете ги темите што искрено ве интересираат, бидејќи тоа ќе го направи вашето академско патување попријатно и поисплатливо.
• Поставете јасни цели: рано дефинирајте ги вашите академски и лични цели. Без разлика дали станува збор за стекнување диплома, следење специфичен пат во кариерата или развивање нови вештини, имањето јасни цели ќе ви обезбеди вистинска насока и мотивација во текот на вашите студии.
• Развијте силни навики за учење: негувајте ефективни навики за учење и вештини за организирање на времето. Направете распоред за учење и дадете приоритет на задачите врз основа на рокови и важност. Доследноста и дисциплината се клучни за академскиот успех.
• Прифатете ги предизвиците: Пристапете кон предизвиците и неуспесите како можности за развој и учење. Не плашете се да излезете од вашата комфорна зона, да преземете нови предизвици и да учите како од успесите, така и од неуспесите.
• Бидете организирани: бидете организирани со следење на роковите, задачите и важните датуми. Користете планери, календари или дигитални алатки за да го менаџирате вашето време и ефективно да ги приоритизирате задачите.
• Вклучете се активно во наставата со учество во дискусии, поставување прашања и барање разјаснување кога е потребно. Искористете ги можностите за практично учење, истражувачки проекти, практикантство и воннаставни активности.
• Останете љубопитни: негувајте доживотна љубов кон учењето со тоа што ќе останете љубопитни и со отворен ум. Истражете ги различните перспективи, барајте нови искуства и прифатете можности за личен и интелектуален раст.
• Уживајте во патувањето: Конечно, не заборавајте да уживате во патувањето. Прифатете ги возбудата, предизвиците и откритијата што доаѓаат со тоа што сте студент. Негувајте ги пријателствата, спомените и искуствата што ќе го дефинираат вашиот академски и личен раст и развој.