На 14 ноември 2024 г., во рамки на иницијативата Катедра Аденауер 2024 ќе се одржи третата и последна панел-дискусија со тема „Регионална соработка и европска интеграција – Агендата на ЕУ за Западен Балкан“. Овој настан ќе се одржи во Правната клиника при Правниот факултет на Универзитетот „Гоце Делчев“ во Штип, со почеток во 11 часот.
Главни учесници и теми на дискусија
Настанот е организиран од Фондацијата „Конрад Аденауер“, Центарот за европски студии „Вилфрид Мартенс“ во Брисел, Универзитетот „Гоце Делчев“ – Штип и Академијата за европски интеграции во Скопје. Ќе учествуваат значајни претставници од академската и политичката сфера, меѓу кои:
- Марија Петрушевска (пратеничка, ВМРО-ДПМНЕ);
- Моника Зајкова (пратеничка, ЛДП);
- Ана Никодиновска-Крстевска, проректор за меѓународна соработка и професор на Универзитетот „Гоце Делчев“;
- Олга Кошевалиска, деканка на Правниот факултет на Универзитетот „Гоце Делчев“;
- Васко Наумовски и Александар Спасеновски, професори на Правниот факултет „Јустинијан Први“ во Скопје.
Панелот ќе биде модериран од новинарката Нора Калиќи.
Отворање и модерација
На отворањето на панелот ќе се обратат и претставниците на организаторите, меѓу кои се:
- Даниел Браун, официјален претставник на Фондацијата „Конрад Аденауер“;
- Катерина Јакимовска, виш координатор за настани во Центарот за европски студии „Вилфрид Мартенс“;
- Дејан Мираковски, ректор на Универзитетот „Гоце Делчев“;
- Ангела Анѓеловска, проектен менаџер во Академијата за европски интеграции.
Катедра Аденауер – Можност за продлабочена дебата и регионална поврзаност
Катедра Аденауер претставува образовна и научна платформа, која им овозможува на студентите, експертите и носителите на политички функции да разменат мислења и идеи за актуелните прашања поврзани со Европската Унија и регионалната интеграција. Темите ќе се фокусираат на предизвиците за европската интеграција на Западен Балкан, како и на можностите за продлабочување на регионалната соработка.
