По повод Денот на човековите права, мрежата на Јуроп хаус (Europe House) при Делегацијата на Европската Унија, во соработка со Обединетите нации и Министерството за образование и наука, лансира интерактивна онлајн игра „НАВИГАТОР“. Играта е наменета за младите, студентите и учениците, но и за пошироката јавност, со цел да се подигне свеста за човековите права на забавен и едукативен начин.
Преку девет „планети на знаење“ учесниците ќе се соочат со прашања од различни области, како здравство, детски права, заштита на лични податоци и дискриминација. Играта е активна од 10 до 24 декември, а учесниците кои ќе освојат најмалку 70% од поените имаат можност да освојат награди, вклучително и главната награда – ваучер за ИТ опрема во вредност од 60.000 денари.
Извлекувањето на наградите ќе се одржи на 25 декември, а играта е достапна на македонски и на албански јазик преку веб-страницата на Јуроп хаус.
Проектот е поддржан од амбасадите на земјите членки на ЕУ и Бирото за развој на образованието, што овозможува негово користење во сите државни средни училишта во двонеделниот период.
